Nyɔ Kea ‑seia' ɔɔ nʋɛ 'mʋa‑
16
Dafi 'a 'dʋ.
'Oo Kea ɛ fuo 'mii, 'de ɛ o 'bo 'ma 'wlaa sro'.
2 'Ɩn wlu' 'de Tʋ "bo ‑pee, 'ɩn 'naa:
‑Mɔ ‑nɩ 'ma Kea, dɩ 'dɔe "klein 'ɩn 'blea a ‑mɔ ‑nyɩ" 'ʋn.
3 Nyʋ ‑ʋʋ ‑tea ‑ma ‑tea' 'de 'blʋa ‑nɛ "kpei ɛ
ʋʋa' 'tʋn "ji 'ʋn 'ɛ, ʋʋmʋ ‑nɩ nyʋ "klae" ‑jɔɔn'‑.
4 Nyʋ "klein ‑a ‑pɔan' kɔun "jri 'dei nmɔa' i ɛ,
ʋʋa ‑tuɛ" ʋʋa' 'kle "kpei.
Ʋʋ ke 'ɩn se ʋʋa' nmɔ sraa' ‑sa na' mu i.
Ʋʋa kɔin 'a 'nynɩ mɩ se 'de 'ʋn 'wɔn mɔ jii ‑wee'‑ ‑wee'‑.
5 Nyɔsoa, ‑ma 'sʋ ‑nɩ 'ma Kea,
‑ɩn nʋɛ 'ʋn dɩ 'dɔe "jrii‑, ‑mɔ 'ɩn kpa,
'ma 'kmʋ ‑wee'‑ nɩɛ 'de ‑ʋn 'kwa.
6 'Ma ‑nɛ 'fɔ ‑ɩn ‑nyɩa" 'ʋn ɛ, ɛ nmɔ "jrii,
'ma ‑nɩ 'kɛn se "jriɛ i ‑saa ‑ka nɩ‑.
7 ‑Ma ‑tuɛ" 'ʋn 'snɩ Tʋ "bo,
‑bo 'ɩn nɩ 'e "nyɩɔ o ɛ, ‑ma tɔɔ 'ʋn dɛ.
Ɛmɛ ‑tɩ 'ma ‑pɔn ‑ɩn ‑je 'ʋn ‑je opo
ɛmɛ ‑tɩ 'ma po ‑ʋn 'sɛ‑.
8 'Ma "jri nɩɛ 'e Nyɔsoa ‑pʋn" jeejee,
dɛ ‑nʋɛ ɛmɛ ‑nɩ 'de 'ʋn ‑pʋn"
ɛmɛ ‑ɛɛ ‑tɩ' dɛ "oo dɛ jrɛ' 'ɛ faʋn se 'ʋn nʋ i.
9 'De ɛɛ' ‑tɩ' 'ʋn ɛ,
'ɩn nɩɛ 'e 'mʋa‑ 'ʋn ‑wɛe 'ma ble
'ma 'bɛɛ‑ ‑ma 'nynɩ "i,
'ma nyiɔjɔ ‑wee'‑ "maeɛ i.
10 ‑Ɩn se 'ʋn 'mɛa‑ kwa 'bɔɔ i,
'mɔ ‑ɔ ‑nɩa ‑ma dbonʋɩ
‑ɔɔ' pooa wlu fai" ɛ. ‑Ɩn se 'ʋn i "tai
‑wɛe 'ɩn se 'e 'mɛʋ "klu siei 'de ‑kwlu'.
11 ‑Ma tɔɔ 'ʋn 'kmʋ nɩ ‑je,
'mʋa‑ ‑tuu" ‑tuu ‑nɩ 'de ‑ʋn "juɛi,
dɩ 'dɔe ‑ɩ sea i sɔn ‑ta 'ble nɩɛ 'de ‑ʋn 'kwa.